ತಾಂಡಾ, ಹಟ್ಟಿ ಹಾಗೂ ಗೊಲ್ಲರಹಟ್ಟಿಗಳಲ್ಲಿ ದಶಕಗಳಿಂದ ವಾಸಿಸುತ್ತಿದ್ದ ಅನೇಕ ಕುಟುಂಬಗಳು ಯಾವುದೇ ಅಧಿಕೃತ ದಾಖಲೆಗಳಿಲ್ಲದೆ ಅಸಮಾಧಾನ ಮತ್ತು ಅತಂತ್ರದ ಜೀವನ ನಡೆಸುವಂತಾಗಿತ್ತು. ಮನೆ ಇದ್ದರೂ ಹಕ್ಕಿಲ್ಲದ ಸ್ಥಿತಿ, ಭದ್ರತೆಯಿಲ್ಲದ ಬದುಕು ಇವರ ದಿನನಿತ್ಯದ ವಾಸ್ತವವಾಗಿತ್ತು. ಈ ಸಮಸ್ಯೆಗೆ ಶಾಶ್ವತ ಪರಿಹಾರ ನೀಡುವ ಉದ್ದೇಶದಿಂದ ಕರ್ನಾಟಕ ಭೂ ಸುಧಾರಣಾ ಕಾಯ್ದೆಗೆ 2017ರಲ್ಲಿ ಮಹತ್ವದ ಕಾನೂನು ತಿದ್ದುಪಡಿ ತರಲಾಯಿತು.
ಈ ತಿದ್ದುಪಡಿಯ ಮೂಲಕ, ಕಾಲಾನುಕಾಲದಿಂದ ದಾಖಲೆ ರಹಿತವಾಗಿ ವಾಸಿಸುತ್ತಿದ್ದ ಕುಟುಂಬಗಳಿಗೆ ಹಕ್ಕುಪತ್ರ ಹಾಗೂ ಅಧಿಕೃತ ದಾಖಲೆಗಳನ್ನು ಒದಗಿಸುವ ಪ್ರಕ್ರಿಯೆ ಆರಂಭವಾಯಿತು. 2017ರಲ್ಲಿ ಕಾಯ್ದೆ ತಿದ್ದುಪಡಿ ಆದ ಬಳಿಕ 2023ರ ಮೇ ತಿಂಗಳವರೆಗೆ ಕಳೆದ 6 ವರ್ಷಗಳಲ್ಲಿ 1.08 ಲಕ್ಷ ಕುಟುಂಬಗಳಿಗೆ ಹಕ್ಕುಪತ್ರಗಳನ್ನು ವಿತರಿಸಲಾಗಿತ್ತು.
ಇದಕ್ಕೆ ಮುಂದುವರಿಯಾಗಿ, ಮೇ 2023 ರಿಂದ 2025ರ ಅವಧಿಯಲ್ಲಿ ಮತ್ತಷ್ಟು 1.11 ಲಕ್ಷ ಕುಟುಂಬಗಳಿಗೆ ಹಕ್ಕುಪತ್ರಗಳು ನೀಡಲಾಗಿದೆ. ಸರ್ಕಾರ ಈಗ ಮತ್ತೊಂದು ಹಂತವಾಗಿ, ಮೇ 2025ರ ನಂತರ ಇನ್ನೂ 1.10 ಲಕ್ಷ ಕುಟುಂಬಗಳಿಗೆ ಹಕ್ಕುಪತ್ರ ವಿತರಿಸುವ ಪ್ರಕ್ರಿಯೆಯನ್ನು ತ್ವರಿತವಾಗಿ ಪೂರ್ಣಗೊಳಿಸಿ, 2026ರ ಫೆಬ್ರವರಿ ಒಳಗಾಗಿ ಈ ಗುರಿಯನ್ನು ಸಾಧಿಸಲು ನಿರ್ಧರಿಸಿದೆ.
ಈ ದಶಕಗಳ ಸಮಸ್ಯೆಗೆ ಪರಿಹಾರ ನೀಡುವ ಮಹತ್ವದ ಕಾರ್ಯವು **‘ಕಂದಾಯ ಗ್ರಾಮ ರಚನೆ ಅಭಿಯಾನ’**ದ ಮೂಲಕ ನಡೆಯುತ್ತಿದೆ. ದಾಖಲೆ ರಹಿತ ವಸತಿ ಪ್ರದೇಶಗಳು ಹಾಗೂ ಮನೆಗಳನ್ನು ಗುರುತಿಸಿ, ಸರ್ವೆ ನಡೆಸಿ, ಅಗತ್ಯ ದಾಖಲೆಗಳನ್ನು ಸಿದ್ಧಪಡಿಸಿ, ಅಧಿಸೂಚನೆ ಹೊರಡಿಸಿ, ಹಕ್ಕುಪತ್ರ ವಿತರಿಸಿ, ಬಳಿಕ ನೋಂದಣಿ ಮೂಲಕ ಕ್ರಯಪತ್ರದಂತೆ ಮಾನ್ಯತೆ ನೀಡಿ, ಸ್ಥಳೀಯ ಸಂಸ್ಥೆಗಳ ಮೂಲಕ ಪಕ್ಕಾ ಖಾತೆ ಮಾಡಿಸುವವರೆಗೂ ಸಂಪೂರ್ಣ ಮಾಲಿಕತ್ವದ ಭದ್ರತೆ ಒದಗಿಸಲಾಗುತ್ತಿದೆ.
ಈ ಯೋಜನೆಯ ಪ್ರಮುಖ ಲಾಭಾಂಶವೆಂದರೆ, ಇದರ ಬಹುತೇಕ ಫಲಾನುಭವಿಗಳು ಬಡ ಮತ್ತು ಅಂಚಿನಲ್ಲಿರುವ ಕುಟುಂಬಗಳೇ ಆಗಿದ್ದಾರೆ. ಅರ್ಜಿ ಸಲ್ಲಿಸಲು ಜನರು ಕಚೇರಿಗಳಲ್ಲಿ ಅಲೆಯಬೇಕಾದ ಅವಶ್ಯಕತೆಯಿಲ್ಲ. ಬದಲಾಗಿ, ಕಂದಾಯ ಇಲಾಖೆಯ ಅಧಿಕಾರಿಗಳು ಸ್ವತಃ ಮನೆ ಬಾಗಿಲಿಗೆ ತೆರಳಿ ಎಲ್ಲ ಪ್ರಕ್ರಿಯೆಗಳನ್ನೂ ನೆರವೇರಿಸುತ್ತಿದ್ದಾರೆ.
ಈವರೆಗೆ ಸಾಧಿಸಿರುವ ಪ್ರಗತಿಯನ್ನು ಒಳಗೊಂಡರೆ, ಒಟ್ಟಾರೆ ಸುಮಾರು 4 ಲಕ್ಷ ಕುಟುಂಬಗಳಿಗೆ ಶಾಶ್ವತ ನೆಮ್ಮದಿ, ಭದ್ರತೆ ಮತ್ತು ಗೌರವದ ಬದುಕು ಒದಗಿಸಿದಂತಾಗಿದೆ.
